" />" />" />

BATUPUEI (MATUPI KHOPUEI)

MATU RAM HAM KAM HLAH SIH

 

 

CADONG HLAI NAH


Apatuikong, khonu bungtlang,
Khopaeh hamyoe, kholi omthen,
Along vancong, bongkung tuili,
Kathin longtah a moe amoe oe,
Kako long tah a nai a nai oe.
 
Apatui kong, tluknong huithim,
Laklai sihtol,
Acuek nai tuem vaeng a tah,
Pa ai cungpoel, ti lik ngal sen,
Olaa cing tang, a pom kun ki ne,
Unghae sakhi, thingsong baekping,
Ahloem u,
Ngalyong okrhul a vai u.
 
Apa tuikong rhaeng si man cong,
Tumsai ngol buel, kungca long tlang,
Cahaeh thakvoh, kalsai khovil ah,
Rhaikit bom lum, rhaisueng muemthen,
Thimvoel rhai ul, thing dong rhai vang,
Lutum rhaidawn, ding tawn rhaithang te,
Ya hoe a tuem manu, ka pum tim ham la,
Rhaikut ka som bong pa lah sue,
Rhaikho ka ci ngae pa lah sue.
 
Apatui Kong
Kaisi lingyawn, rhumpu putva,
Dal tueng rhophae,
Khoisih canglong,
Tlangding bahoe, vahlo vango,
Huphup loei bal pawn coi ni,
A khuen tuikong kah
Haidut haipong loh cuhu bal coi ni.
 
Apa hmuen lung,
Umrhaeh lunghli, mueihung tuima,
Tuimeung lungtang,
Likma sael kho,
Koikhae hla va, thimkuet povan,
Tuek tuek ka hil koep la suei,
Khaeh khaeh ka lan koep la sue.
 
Apa khoyung,
Ambal kaiva, sael rha sung hai,
Dung im Aimul, tui loei nga bol,
Tunhnong tuibaelh, Yung rhaem yung lam,
Bahoe yuntui a phuet na.
Ya hoe a pa kho yung kah
Sokca paem sang a tah,
Cocae anva, maihawt kolai,
Dikdik saitlim bal coi ni,
Loei loei sainoe bal coi ni.
 
Apa tol khoeng,
Along van cong, Lungken yung lam,
Rhosueng namtlang, samyong kai van,
Sungvan manawt, okbol sung hai,
A cuek naituem rhoek long tah,
Lumthawt rhui nawt a sol dae,
Lumngai rhui nawt nawt a toe dae.
 
Ya oe ta hae a tah,
Na oingaih ka loh,
Mucih rhaeng kan vai tak,
Tamat rhaeng kan hloem tak na rhuet ah,
A pa tui kong, khonu bung tlang,
Kho li omthen ah,
Ming pawt kho li kah,
Rhal mah cahai loh,
Nambueng im han sawn boei,
Namtlak long han tuk boeih tih,
Daeng tloep nam tlang na la,
Rhokah somthag, ka Bol van li kah,
Lungbok Thingnu tah a phol vik.
 
Rhal mah ca hai nang ngawn tah,
Olaa pang vau, a yam cing tang,
Cungki hmaiphae na uep na tih,
Ka Bol van li kah, Lungbok Thingnu,
Na phol dae
Rhokah hmui ah, Matu ca loh
Thangvuen ah, omvai ah,
Cangsing mu la ka poe bal pueng ni.
Khohni Mangrhai a mah te,
Sam ding ka tu koei ve tih,
Lukil lung ting, Tuicin kungva,
Aidak thim hni, Bolcaeng laicang,
Kaisi Lungpael ah,
Thing Lak mu poe la,
Loei Loei ka kangding bal pueng ni.
Koep koep ka mupoe bal pueng ni.
 
Unang nim rhalmah ca hai nang mah nim,
Daeng tloelh namtlang na la,
Ka bol van li kah Lungbokthingnu na phol te,
Ih sap a khaw kan thui rhawp eh,
A khaw kan taeng rhawp eh.